Синоќа во с.Велгошти се одржа традиционалната културна манифестација „Вечер на Живко Чинго“.

Пред  љубителите  на пишуваниот збор, пригодно обраќање имаше Претседателот на Советот на Општина Охрид, Перчо Божиноски.

– Добредојдовте на традиционалнaта „Вечер на Живко Чинго“- манифестација која не е само потсетник на еден од најголемите мајстори на македонскиот расказ, туку и живо место каде што зборот продолжува да пулсира и пресоздава.

Живко Чинго не научи дека расказот е најдлабокиот отпечаток на човековата душа, магичен мост меѓу нашата традиција и современиот копнеж за слобода. Неговата литература останува траен патоказ за секој што се осмелува да пишува.

Вечерва, додека се сеќаваме на неповторливиот Живо Чинго и неговата Пасквелија, имаме посебна чест да му ја дадеме наградата за најдобар расказ на д-р Марјан Патлиџанковски.

Со својот авторефлексивен  и силен  расказ „Службен пат до Тирана “ авторот Патлиџанковски покажува дека македонскиот  краток расказ е и тоа како жив  и подготвен да ги предизвика современите естетски и човечки прашања.

Наградата не е само признание за авторот, туку и потврда дека меѓу нас постојат творци кои знаат да ја прикажат  вистината во само неколку страници..

Му честитам на Марјан Патлиџанковски за заслуженото признание и му посакувам уште многу испишани страници кои ќе ги допираат срцата на читателите– подвлече Божиноски.

На настанот беше доделена наградата на д-р Марјан Патлиџанковски чиј расказ „Службен пат до Тирана“ по претходно распишан конкурс на општина Охрид беше избран за најдобар. Обраќање имаше и добитникот, а беседа за  Живко Чинго одржа Бранко Цветкоски, поет, литературен критичар, преведувач и новинар.

Културното случување беше заокружено со културно – уметничка програма и изведба на проектот „Македониум“.