ГОДИШНИНА ОД РАЃАЊЕ НА КЛИМЕНТ ЏАМБАЗОВСКИ

Климент Џамбазоски, историчар, архивист и академик, еден од најголемите познавачи и истражувачи на документацијата за Македонија во архивите во Србија. Во 1959 година, на Историско-филолошкиот факултет во Белград ја одбранил докторската дисертација „Културно-општествените врски на Македонија со Србија во текот на XIX век“. Благодарејќи на богатите истражувања на архивите во Србија и публикуваните трудови, избран е за виш научен соработник на Балканолошкиот институт на САНУ, каде што е и пензиониран во 1985 година. Избран е за член на МАНУ надвор од работниот состав во 2006 година. Објавува повеќе студии и поголем број одделни публикации. Најзначајна му е серијата „Граѓа за историјата на македонскиот народ од Архивот на Србија“ во 5 томови во 14 посебни книги, што го опфаќаат периодот од 1820 до 1891 година.