Настани

15 октомври 1947 година е роден Паско Кузман, познат охридски и македонски археолог, кој во 2001 година ја откри златната маска кај Горна Порта во охридската тврдина и е иницијатор за востановување на „Златната соба“ во Музејот во Охрид, каде што се изложени артефактите од ова откритие. Како археолог учествувал во бројни археолошки истражувања во охридскиот крај и пошироко и за тоа напишал повеќе научни статии и книги. Бил директор на Заводот за заштита на спомениците и Народен музеј во Охрид и директор на Дирекцијата за заштита на културното наследство на Република Македонија.

22 октомври 1878 година е роден познатиот македонски револуционер, учител и охридски војвода  Христо Узунов. Во текот на Илинденското востание бил началник на охридскиот револуционерен округ, член на Охридското горско началство и  учесник на Смилевскиот конгрес. На Конгресот го застапувал мислењето дека нема услови да се дига востанието, но морал да ги почитува заклучоците на поголемиот дел од делегатите на Конгресот. Во текот на Илинденското востание раководел со четите во борбата кај Рашанец. По Илинденското востание ја продолжил револуционерната активност со својата чета, но во 1905 година бил предаден и опколен од турскиот аскер во селото Цер. Не сакајќи да се предаде, целата чета извршила колективно самоубиство на 24 април 1905 година. Оставил претсмртно писмо во кое порачува да продолжи борбата до конечно ослободување на Македонија. За својата револуционерна активност водел дневник кој претставува драгоцен извор на податоци околу подготовките и текот на Илинденското востание.

Димче Протуѓер (Охрид, 24 октомври 1920 — Скопје, 30 март 1995 ) — македонски уметник, сликар, резбар и графичар. Во Охрид е роден Димче Протугер, уметник, сликар, резбар и графичар, еден од основоположниците на македонското сликарство по Втората светска војна. Бил директор на резбарската школа во Охрид. Учествувал на групни и самостојни изложби во Македонија и надвор од неа. Се занимавал со сликарство, графика, цртеж, таписерија, зграфито, витраж и извел повеќе монументални композиции во овие техники. Ја добил наградата за животно дело „Бигорски следбеници” од ДЛУПУМ и Орден на Братство и Единство. Починал во Скопје на 30 март 1995 година.

28 октомври 1867 година е роден Лев Огненов, познат охридски учител и револуционер – првиот претседател на охридскиот комитет на ВМРО, од 1894 година. Бил меѓу најучените граѓани во неговото време, со завршен Роберт колеџ во Цариград, 12 години бил секретар на Охридската митрополија, училишен инспектор и директор на Охридската гимназија. Негов татко бил познатиот охридски првенец Симон Кармиш, а потоа бил посинет од неговиот баџанак – познатиот првенец Петре Огнен. Го владеел бугарскиот, англискиот, францускиот и турскиот јазик, а се служел и со грчкиот и латинскиот јазик. Умрел во Охрид во 1953 година, на 86-годишна возраст.

На 28 октомври 1869 година во Охрид е роден Стефан Јакимов Дедов – еден од поактивните македонски преродбеници. Како студент на Белградскиот универзитет, во 1902 година е основач на Македонски клуб кој го издава  својот орган „Балкански гласник“ под негова редакција. Но, заради прокламирање на македонската национална програма и македонскиот јазик, како посебен, за кратко време весникот  бил забранет, а Стефан Дедов, заедно со Дијамандија Мишајков, морале да ја напуштат Србија и да заминат за Петроград во Русија. Таму, Дедов е еден од иницијаторите за формирање на Македонско научно-литературно другарство. Во април 1903 година во Софија го издава весникот „Балкан“, а во 1904 година е издавач на третиот весник „Куриер“ како орган на „новото македонско движење“. Дедов е потписник на Меморандумот до Руската влада, што претставува прва комплетна  македонска  национално-ослободителна програма. Убиен е по порачка во Софија, како соработник со тогаш завојуваната Србија.

7 ноември 1944 година, во борбата за ослободување на Охрид, загина 17-годишната партизанка Јасна Ристеска. Родена е во 1927 година во селото Рамне, рано останала сираче и како малолетна својот леб го заработувала како слугинка по богатите охридски куќи. Денес, нејзиното име го носи Детска градинка во Охрид, а во селото Рамне е поставена биста.